Bring Warmte en Ondersteuning aan Kwesbare Persone Gedurende die Winterseisoen
WinterHoop, ‘n gevestigde inisiatief wat reeds vir die afgelope twee-en-twintig jaar ‘n verskil maak, keer hierdie jaar terug met ‘n veldtog om hoofsaaklik wintersorg en noodsaaklikhede aan weerlose persone en gemeenskappe te verskaf. Die gesamentlike poging tussen PEN (Pretoria), MES (Johannesburg, Kempton Park, Gqeberha en Kaapstad), His Hands (Durban) en Torings van Hoop (Bloemfontein) het ten doel om kwesbare gemeenskappe regoor Suid-Afrika gedurende die koue wintermaande te ondersteun.
Sedert die ontstaan het WinterHoop toenemende ondersteuning van die publiek, skole, plaaslike geloofsgemeenskappe, besighede en die media ontvang, wat die posisie as ‘n nasionale beweging gevestig het. Die hoofdoel van hierdie veldtog is om op ‘n verantwoordelike wyse ‘n helpende hand uit te reik en sodoende te verseker dat kwesbare persone die nodige hulpbronne het om die koue winterseisoen te trotseer. Hierdie hulpbronne sluit klere, kos, komberse en finansiële donasies in.
Winterhoop erken dat die sukses van die veldtog nie moontlik sou wees sonder die ondersteuning en samewerking van die publiek, skole, plaaslike gemeenskappe, besighede en die media nie. Hul bydraes het Winterhoop in staat gestel om ‘n netwerk van meer as 140 insamelpunte te skep, wat verseker dat donasies effektief ingesamel en versprei word binne dieselfde plaaslike gemeenskappe waar dit die nodigste is.
WinterHoop moedig individue, skole, besighede en organisasies regoor Suid-Afrika aan om saam te span en hierdie belangrike veldtog te ondersteun. Deur klere, kos, komberse te skenk of finansiële bydraes te maak, word elke deelnemer ‘n agent van verandering wat warmte en hoop bring aan diegene wat dit die meeste nodig het.
